இலங்கை நாடாளுமன்றத்தில் உரை நிகழ்த்திய தமிழ்த் தேசிய மக்கள் முன்னணியின் தலைவரும் நாடாளுமன்ற உறுப்பினருமான கஜேந்திரகுமார் பொன்னம்பலம், செம்மணி மனிதப் புதைகுழி விவகாரத்தில் அரசு மேற்கொண்டு வரும் நடவடிக்கைகள் குறித்துக் கடுமையான குற்றச்சாட்டுகளை முன்வைத்துள்ளார்.
குற்றம் சாட்டப்பட்ட தரப்பாக இருக்கும் அரசே விசாரணைகளை முன்னெடுக்கும் போது உண்மைகள் மூடிமறைக்கப்படுவதாக அவர் சாடியுள்ளார்.
பாராளுமன்றத்தில் உரையாற்றிய கஜேந்திரகுமார் பொன்னம்பலம் தெரிவித்த முக்கிய அம்சங்கள்:
வரலாற்று உண்மை மற்றும் புறக்கணிப்பு: 1996 – 1997 காலப்பகுதியில் இடம்பெற்ற சம்பவங்களைத் தொடர்ந்து, 2000 ஆம் ஆண்டளவில் செம்மணிப் புதைகுழிகள் குறித்த விவரங்கள் முதன்முதலில் வெளிவந்தன.
கிருசாந்தி குமாரசுவாமி படுகொலை வழக்கில் குற்றம் சாட்டப்பட்ட நபர், செம்மணிப் பகுதியில் 500 முதல் 600 க்கும் மேற்பட்ட உடல்கள் புதைக்கப்பட்டிருப்பதாக ஆவணப்பூர்வமாகக் குறிப்பிட்டிருந்தார்.
அரசின் அலட்சியம்: குற்றம் சாட்டப்பட்டவரால் அடையாளப்படுத்தப்பட்ட இடத்திலிருந்து வெறும் 100 யார் (Yards) தொலைவிலேயே தற்போது புதிய புதைகுழிகள் கண்டுபிடிக்கப்பட்டுள்ளன.
அன்றைய சந்திரிகா குமாரதுங்கா அரசாங்கம் இந்த விவகாரத்தில் குற்றம் சாட்டப்பட்ட தரப்பாக இருந்ததால், உண்மை வெளிவந்துவிடக் கூடாது என்பதற்காக 15 உடல்களுடன் விசாரணைகளை முடித்துக்கொண்டு எஞ்சிய இடங்களை முற்றாகப் புறக்கணித்தது.
நீதியை மூடிமறைக்கும் கட்டமைப்பு: குற்றம் சாட்டப்பட்ட தரப்பான அரசே விசாரணையாளராகவும் செயல்படும் போது, முறையான நீதி கிடைக்காது என்பதற்குச் செம்மணி விவகாரமே வரலாற்றுச் சான்றாகும்.
சர்வதேச விசாரணையின் தேவை: உள்ளூர் பொறிமுறைகள் மூலம் தமிழ் மக்களுக்கு ஒருபோதும் நீதி கிடைக்காது என்பதால், செம்மணி உட்பட அனைத்துப் புதைகுழிகள் தொடர்பாகவும் சர்வதேச நிபுணர்களின் கண்காணிப்பில் முழுமையான சர்வதேச விசாரணை நடத்தப்பட வேண்டும்.
பாதிக்கப்பட்ட தமிழ் மக்களின் நீதிக்கான போராட்டத்தை உள்நாட்டு நாடகங்கள் மூலம் திசைதிருப்ப முடியாது என்றும், சர்வதேச சமூகத்தின் தலையீடே உண்மையை வெளிக்கொண்டுவர ஒரே வழி என்றும் கஜேந்திரகுமார் பொன்னம்பலம் தனது உரையில் அழுத்தமாகத் தெரிவித்தார்.
About The Author
